छत्रपती सेवा प्रतिष्ठान, नागपूर-पुणे

छत्रपती शिवाजी महाराजांचे जीवनचरित्र ऐकणाऱ्या, वाचणाऱ्या प्रत्येक व्यक्तीच्या मनामध्ये सकारात्मकतेचा प्रकाश पडतोच एवढे ते भारून टाकणारे, प्रखर आणि जाज्वल्य आहे. त्याचा अंगीकार प्रत्येकजण आपापल्या जीवनात वृत्ती आणि क्षमतेनुसार करत असतो. मात्र शिवरायांच्या जीवनचरित्राचा अभ्यास संशोधन, प्रचार-प्रसार निरपेक्ष वृत्तीने करण्याचे आणि शिवचरित्राच्या माध्यमातून पिढ्या घडवण्याचे व्रत जीवनभर स्वीकारणारे समर्पित ध्येयवादी अगदी मोजके आहेत. त्यापैकीच एक आहेत श्री विजयराव देशमुख उपाख्य सद्गुरूदास महाराज. शिवचरित्राचा अभ्यास, संशोधन आणि प्रचार-प्रसार हेच आपले जीवितकार्य आहे हा दृढ संकल्प त्यांनी वयाच्या १९ व्या वर्षीच सोडला होता. या संकल्पाची अखंड पूर्तता ते आजवर करीत आले आहेत. शिवचरित्र याच एका विषयावर त्यांनी हजारोंच्या संख्येने व्याख्याने दिली आहेत, विपुल ग्रंथनिर्मिती त्यांनी केली आहे. अभ्यासू शिवप्रेमींसाठी त्यांनी असंख्य ‘किल्लेदर्शन यात्रा’ आयोजित केल्या आहेत. शिवचरित्राच्या प्रकाशात अनेक पिढ्यांचे जीवन त्यांनी उजळवून टाकले आहे.  म्हणूनच त्यांना समर्पित जीवन जगणारे ‘तेजस्वी शिवयोगी’ असे संबोधले जाते.